Комисијата за заштита и благосостојба на животните одржа работен состанок
- Среда, 13 Март 2019 14:52
Комисијата за заштита и благосостојба на животните која врз основа на Законот за заштита и благосостојба на животните ја формира Агенцијата за храна и ветеринарство, вчера одржа работен состанок на кој беше подготвен и разгледан нацрт текст на Правилникот за регистрација на сопствениците на куче, одгледувачниците и продавниците на домашни миленици. На состанокот беа разгледани барањата во однос на условите, просториите и опремата кои треба да ги исполнат продавниците за домашни миленици и одгледувачниците, како и за формата и содржината на евиденцијата која треба да ја водат регистрираните сопственици на куче, одгледувачниците и продавниците на домашни миленици, како и формата и содржината на регистарот на регистрирани сопственици на куче, одгледувачници и продавници за домашни миленици. Овој подзаконски акт ќе биде донесен по усвојувањето на измените и дополнувањата на Законот за заштита и благосостојба на животните, со кој ќе се доуреди одговорното сопствеништво на домашните миленици.
Повеќе: Комисијата за заштита и благосостојба на животните одржа работен состанок
Презентирани новите процедури на стекнување статус слободно одгледувалиште од болеста трихинелоза
- Недела, 10 Март 2019 11:31
На барање на комерцијалните свињарски фарми од земјава, денес во Агенцијата за храна и ветеринарство се одржа работен состанок со одгледувачите на овој вид добиток на кој беа презентирани новите процедури кои ги подготви Агенцијата а кои се однесуваат на стекнување на статус слободно одгледувалиште од болеста трихинелоза. Станува збор за сет на документи кои ги подготви Агенцијата кои се во насока на зајакнување на конкурентноста на домашните одгледувачи на свињи, но и за унапредување на меѓународната трговија со свинско месо и производи од свинско месо. Новите процедури се дел од мерките кои покрај воведените биосигурносни мерки се гаранција за квалитетот, но пред се со кои се потврдува безбедноста на овој вид производи.
Активно се работи на подготовка на првото законско решение за донирање храна
- Среда, 06 Март 2019 15:34
Дефинирање на надлежностите на сите надлежни институции кои ќе го креираат законското решение за регулирање на донирањето на вишоците храна од операторите преку интензивирање на соработката на невладините организации кои непосредно ќе бидат вклучени во дистрибуцијата на храната до крајните корисници. Ова се дел од заклучоците од денешниот работен состанок на работната група за изработка на Законот за донирање на вишокот храна кој се одржа во Агенцијата за храна и ветеринарство (АХВ), како институција координатор на овој процес. Во законското решение, според заменик директорот на АХВ Фирус Мемед, вградени и прилагодени на нашите услови ќе бидат постојните законски решенија и искуствата од европските и од земјите од регионот во дефинирањето на стандардите за донирање на храна, чија основа ќе биде безбедноста на храната.
Повеќе: Активно се работи на подготовка на првото законско решение за донирање храна
Одржан првиот состанок на новиот проект на АХВ
- Петок, 08 Март 2019 14:45
Вчера во Агенцијата за храна и ветеринартсво се одржа првиот состанок на Управниот Комитет на проектот ,,Подобрување на спроведувањето на законодавството за здравствена заштита на животните, безбедноста на храна и фитосанитарното законодавство и соодветните информативни системи,,. На состанокот беа присутни претставници од Агенцијата за храна и ветеринарство, Државниот инспекторат за земјоделство - фитосанитарна инспекција, Фитосанитарна управа и Државна фитосанитарна лабораторија како главни корисници на проектот и преставници од Делегацијата на ЕУ која е договорен орган за имплементација на проектот.
Во јануари спроведени 5103 инспекциски контроли
- Петок, 01 Март 2019 15:26
Врз основа на воспоставениот интегриран систем на контрола, со цел елиминирање на можнoста на пазарот да се пласира небезбедна храна, спречување на евентуални труења и инфекции и заштита на правата на потрошувачите, инспекциските служби на Агенцијата за храна и ветеринарство во јануари годинава, спроведоа вкупно 5103 инспекциски надзори. Од нив, 3790 редовни, 488 контролни и 825 вонредни контроли.
Врз основа на извршените надзори, за констатираните недоследности, на операторите со храна изречени им се вкупно 534 мерки од кои, 391 решение за отстранување на недоследности, 131 едукација, изречени се 3 парични казни, дадени се 6 покани за порамнување со прекршочен платен налог и поднесени се 3 прекршочни пријави.
