Нуспроизводи - Категоризација
- Вторник, 19 Ноември 2013 09:29
КАТЕГОРИЗАЦИЈА
Законот за нус производи од животинско потекло ја воведе категоризацијата на нуспроизводите од животинско потекло, во зависност од степенот на ризик по јавното здравје и здравјето на животните, во три категории. Со тоа од субјектите се бара правилно да ги категоризираат, собираат, означуваат и чуваат одделно едни од други нуспроизводите од животинско потекло од различните категории.
Нус производите од животинско потекло, производите добиени од нив и производите кои содржат делови од нив, во зависност од степенот на ризикот по јавното здравје или здравјето на животните се категоризираат во:
а) Категорија 1 материјали;
б) Категорија 2 материјали и
в) Категорија 3 материјали.
Категоризацијата на нус производите од животинско потекло се врши според „закон" и по „избор" на субјектот.
Категоризацијата според законот е пропишана во прописите од областа на нус производите од животинско потекло и истата е задолжителна за субјектите.
Категоризацијата по избор на субјектот се извршува во зависност од економските потреби на субјектот и традицијата на пазарот и зависи од изборот на субјектот. При примената на оваа можност секогаш треба да се има во предвид правилото штом производот стане нус производ од животинско потекло истиот не може да влезе во синџирот на храна.
Во оваа правна рамка посебно се издвоени и определени нус производите од животинско потекло одредени како специфичен ризичен материјал од аспект на трансмисивните спонгиоформни енцефалопатии.
Подзаконски акти:
- Листа на категоризирани нус производи од животинско потекло („Службен весник на Република Македонија" бр. 42/12)
- Решение за определување на одредени нус производи од животинско потекло како специфичен ризичен материјал од аспект на трансмисивните спонгиоформни енцефалопатии („Службен весник на Република Македонија" бр. 26/09).