Адитиви
- Вторник, 27 Август 2013 11:33
Адитивите се супстанции кои нормално не се консумираат како храна и нормално не се користат како карактеристични состојки на храната, без оглед дали имаат или не хранлива вредност и кои намерно се додаваат во храната за технолошка намена во производството, преработката, подготовката, обработката, пакувањето, транспортот или складирањето на храната или може рационално да се очекува да бидат присутни во неа или нејзините производи, постанувајќи директно или индиректно компонента на таквите видови храна. Согласно националната легислатива како супстанции слични на адитивите се наведуваат: ароми, помошни технолошки средства и ензими.
Функционални класи на адитиви во храна, адитиви и ензими кои се категоризирани врз основа на технолошката функција која адитивот ја има во прехранбениот производ:
1. „засладувачи“ се супстанции кои се употребуваат со цел придавање на сладок вкус на храната или на трпезните засладувачи;
2. „бои“ се супстанци кои се додаваат или ја освежуваат бојата на храната и вклучуваат природни состојки за храна и природни извори кои обично не се консумираат како храна и кои вообичаено не се употребуваат како карактеристични состојки на храната. Во смисла на овој правилник, бои се препарати добиени од храната или од други хранливи природни материјали произведени со физичка и/или хемиска екстракција која резултира со селективна екстракција на пигментите во однос на хранливите или ароматични состојки;
3. „конзерванси“ се супстанции што го продолжуваат рокот на траење на храната преку заштита од расипувања предизвикани од микроорганизми и/или ја штитат од растот на патогени микроорганизми;
4. „антиоксиданси“ се супстанции што го продолжуваат рокот на траење на храната и ја заштитуваат од расипување предизвикано од оксидација, како масно скиселување и промени во бојата;
5. „носачи“ се супстанции што се употребуваат со цел растворање, разредување или диспергирање или на друг начин физички го модифицираат адитивот или аромата, прехранбениот ензим, нутриенс и/или друга супстанција додадена поради нутритивни или физиолошки цели на храната, без да ја променат нејзината функција (и без да било какво технолошко влијание самата), со цел да се олесни нејзиното ракување, примена или употреба;
6. „киселини“ се супстанции кои што ја зголемуваат киселоста на прехранбените производи и/или и даваат кисел вкус;
7. „регулатори на киселост“ се супстанции што ја менуваат или ја контролираат киселоста или алкалноста на прехранбениот производ;
8. „агенси против стврднување" се супстанции што ја намалуваат тенденцијата на поединечните честички на прехранбениот производ да се врзуваат еден со друг;
9. „агенси против пенење“ се супстанции што ја спречуваат или намалуваат пенливоста;
10. „агенси за зголемување на волуменот“ се супстанции што го зголемуваат волуменот на прехранбениот производ без значително да придонесуваат кон неговата расположлива енергетска вредност;
11. „емулгатори“ се супстанции што овозможуваат формирање или одржување на хомогена смеса на две или повеќе немешливи фази, како што се масло и вода во прехранбениот производ;
12. „соли за емулгација“ се супстанции што ги претвораат протеините содржани во сирењето во дисперзирана форма и на тој начин придонесуваат за хомогена дистрибуција на мастите и другите компоненти;
13. „агенси за зацврстување“ се супстанции што го прават или одржуваат ткивото на овошјето или зеленчукот цврсто или свежо или реагираат со агенсите за желатинизирање со цел производство или зацврстување на гелот;
14. „засилувачи на аромата“ се супстанции кои што го засилуваат постоечкиот вкус и/или мирис на прехранбениот производ;
15. „агенси за пенење“ се супстанции што овозможуваат да се формира хомогена дисперзија на гасната фаза во течен или цврст прехранбен производ;
16. „агенси за желатинизирање“ се супстанции што му даваат на прехранбениот производ форма преку формирање на гел;
17. „агенси за глазирање“ (вклучувајќи ги и лубрикантите) се супстанции што кога се применуваат на надворешната површина на прехранбениот производ, му даваат сјаен изглед или обезбедуваат заштитна обвивка;
18. „хигроскопни средства“ се супстанции што спречуваат сушењето на прехранбениот производ и на тој начин го спречуваат ефектот на ниска влажност од атмосферата или го помагаат растворувањето на правот во течен медиум;
19. „модифицирани скробови“ се супстанции добиени од еден или повеќе хемиски третмани на скробот наменет за консумација, кои можеби биле подложени на физички или ензимски третман и може да бидат кисленски или алкално разредени или избелени;
20. „гасови за пакување“ се гасови со исклучок на воздухот, внесени во пакувањето пред, за време на или по ставањето на прехранбениот производ во пакувањето;
21. „пропеланти“ се гасови со исклучок на воздухот кои го потиснуваат прехранбениот производ од пакувањето;
22. „агенси за нараснување“ се супстанции или комбинации од супстанции кои што ослободуваат гас, и на тој начин го зголемуваат волуменот на тестото;
23. „секвестранти“ се супстанции кои што формираат хемиски соединенија со метални јони;
24. „стабилизатори“ се супстанции кои што овозможуваат одржување на физичко-хемиската состојба на прехранбениот производ; Во стабилизатори спаѓаат и супстанции кои овозможуваат одржување на хомогената диспезија на две или повеќе супстанции кои не можат да се мешаат во прехранбениот производ, супстанции со кои се стабилизира, се задржува или се интензивира постоечката боја на прехранбениот производ и супстанции кои го зголемуваат капацитетот на врзување на храната, вклучувајќи го и формирањето на меѓусебни врски помеѓу протеините кои го овозможуваат поврзувањето на парчињата храна во реконституирана храна.
25. „згуснувачи“ се супстанции кои го зголемуваат вискозитетот на прехранбениот производ;
26. „средства за третман на брашно" се супстанции, со исклучок на емулгатори, кои се додаваат на брашното или тестото со цел да се подобри квалитетот на печењето.
